#ParentLicenses1558

我丈夫係白人，佢最細個弟弟係由細到大都被寵壞咗，例如未夠十八歲要買新跑車；入到間好好嘅大學可以一句唔鍾意間學校，唔理學費宿費都交晒，第二個星期走返屋企，屋企唔係有錢但都唔敢話佢

我丈夫一向頂唔順佢屋企人啲痴線嘢，所以就喺讀完大學後就去香港工作

每當我哋返去探佢屋企人，佢最細個賤格細佬都會同女朋友有咗，每次都話好愛。但到個小朋友唔夠兩歲，佢就會識第二個之後走咗去

直到佢生第三個小朋友嘅時候，奶奶終於忍唔住話佢，叫佢唔好再咁樣害啲小朋友，個個跟住個老母，個老母又同第二啲男人生，幾兄弟姊妹唔同爸爸唔同姓

啲小朋友情緒行為有問題佢又唔理，每個月只見一兩次，一係扔俾奶奶，一係只識買嘢俾啲仔女

佢爆返奶奶轉頭，奶奶都係死死地氣出錢出力同佢湊

今次返去，佢個16歲大女都終於同我哋講，佢由細到大都唔明，點解佢爸爸冇理過佢又話忙，點解又有時間同唔同女人生完一個又一個？所以佢而家唔想見佢爸爸，但佢爸爸又迫佢同佢而家個女朋友做friend

公主無分國界，佢而家個女朋友係MK公主，要全世界圍住佢轉

你哋傾偈冇理佢過十分鐘，公主會黑面，再扔杯茶落地，拍枱走，就因為個個都就晒最細嘅細佬，所以連奶奶都硬食

佢哋剛剛生咗個B，親戚朋友送禮物去佢度，公主話唔想要就唔肯收，門口都唔可以放底禮物

佢女朋友乜家務都唔識做，30幾歲人洗衣機都唔識用，會打電話叫老爺過去，但佢會唔俾老爺入屋，只可以喺門口用電話app控制部洗衣機

做咗老母連奶都唔識沖，要買一支支就咁飲嘅BB奶。如果個B冇返婆婆嫲嫲度，個B連涼都唔沖，面都唔洗，污糟邋遢，塊面敏感都唔理

我唔明白生嚟做乜？答案係公主話佢係特別嘅，一定會令到細佬肯結婚同佢長相廝守

而個細佬真係不知所謂，佢已經有個仔已經搞到有問題，需要長期見治療師；再生咗幾個出嚟，冇一個可以正正常常咁成長，都仲係唔覺得係問題

讀者投稿@Giantelephant