#ParentLicenses1543

呢件事真係困擾咗我幾年，自從Covid-19出現開始發生

我都好明白，喺疫情嘅影響之下，家庭成員多咗留喺家中，衝突亦自然會多咗，但有時真係唔好咁過火，咁自私，去搞埋人哋！

我呢度鄰居有一家人，育有一女一子，大女已成年，細仔讀高小，個男人以前一直唔見佢住喺度，應該因疫情而返唔到大陸先出現

呢一個家庭存在好多問題，屬社署跟進個案，學校知，警察亦知，但遍遍好多事情發生都介入唔到，因為佢哋兩公婆唔願意接受幫助！

本來真係別人家事就唔應該插手，但餐餐半夜三更先嚟嘈交、打仔、鬧仔，每每喺人哋熟睡中被你哋嚇醒，魂魄都未執返齊

我真係唔明，點解你兩公婆嘈交可以咁自私，你有你屋企，你咪喺你屋企入面閂埋門嘈囉，偏偏就要走到去我門口打大交，想點啫？

估你唔想俾你屋企個小朋友睇到你兩公婆嘈交、打交，但你有冇諗過我都有小朋友，我哋都要休息，你會唔會自私咗呀？你又知唔知我小朋友俾你哋嚇到有驚恐症，要見CP，要食藥，每到夜晚就好驚！平時出入亦都好驚！

你哋婚姻有問題，同時覺得你小朋友無辜，唔應該聽到見到。但我一家呢？我小朋友呢？我哋仲無辜呀！

你要打仔鬧仔，點解要喺我門口打？你屋企無地方你打咩？你個仔淒厲嘅喊聲同救命聲，喺正我門口迴盪，聽到都心寒，我小朋友聽到亦好驚，係咁問出面發生咩事？

我初時聽到呢啲嘈吵，唔知你哋係社署跟進個案，個阿媽本身睇落都有啲精神唔對路，個大女亦都係有情緒唔穩定，就四處搵社工機構去想辦法幫你哋，好驚你虐兒打死個仔。然而，真係一個部門踢一個部門，最終發現一直都係社署跟進嘅case！

頂！咁即係跟唔足啦！跟得足點會仲每況越下？個社工仲好意思話我多事，搞到佢，又不停強調呢家人好正常無問題！

哈！我真係見識少，原來咁樣先係好正常，唔正常嗰個反倒係我屋企！

呢家人，一向無朋友，隔離全部當佢透明。鬼咩！係人都避開佢啦！我好心，同佢傾下有冇嘢可以幫忙，佢哋初時講嘢正常，之後就語無倫次跳晒掣，有次仲無啦啦要求我即時出嚟講數！低能！

喂！嗌救命嗰個係你哋呀！嗌報警嗰個都係你哋呀！而且你哋唔係只嗌一兩聲，而係超過 15分鐘唔停咁喺我門口係咁打、係咁嗌呀！我點唔幫你報警呀？幫完你報警仲要俾你怨，俾你鬧，俾你報仇！

卒之警察嚟到，又堅好戲，扮晒冷靜無事發生。好老實，警方見你哋情緒穩定，又唔係爆晒缸，都係轉介返去社署！

之前防暴警察全副裝備，有個仲拎住支長槍，嚇L死人咩！相信大家知咩年份嘅事啦！

原來就係話企圖自殺，警察嚟到又扮正常。呢家人好笑在，經常成日自己報警，然後又扮無事！實情你知唔知醜？

最無辜係個小朋友，喺一個咁嘅家庭環境下長大，可以好得去邊？童年嘅陰影對佢影響有幾深？窮一生金錢同時間都未必醫好！其實，到底佢個仔有冇被虐打，衣服遮住嘅地方係完全無人知！

戥你小朋友慘，唔識教又唔愛就唔好生！但最慘係你而家連累埋我個小朋友呀！

讀者投稿@衰係個掣度