#ParentLicenses2825

早排同朋友去沙灘玩，當天色入黑時，我目擊一宗極度奇怪嘅事

事發於沙灘嘅沖身區附近，有個年約十歲十一歲嘅小妹妹睇落啱啱游完水，已換上普通嘅出街衫，企喺出面走廊位抹緊腳

呢個時候就有個約五六歲，剩係著咗鞋，其他部位全裸嘅男仔跑過來，停左喺小妹妹面前嗌：「姐姐，可唔可以幫我抹乾淨身體呀？」

小妹妹望到個男仔，表情有啲錯愕，明顯被個男仔嚇親，但佢都拎咗條毛巾開始幫男仔抹身，仲好認真咁抹埋男仔嘅下面。當時我心諗：「點解個男仔喺家姐面前唔著衫不突止，而且要個家姐幫手抹身？」

抹完身之後，個男仔原來拎咗件底衫，隨之而話：「可唔可以幫我著衫呀？」再將件底衫遞埋俾小妹妹，小妹妹又幫個男仔著返件底衫

著完底衫後個男仔又擰轉頭跑，一路跑一路嗌：「媽咪，頭先有個姐姐幫我……（我聽唔清楚後面內容）」然後越跑越遠，但依然唔見男仔媽咪喺視線面前出現

開頭以為小妹妹係男仔嘅家姐，但小妹妹全程唔出聲，同個男仔無交流，男仔又用姐姐而非家姐稱呼小妹妹，又無跟著男仔跑，睇落唔似姊弟。於是我就問小妹妹：「你識唔識啱先嗰個男仔㗎？」小妹妹就擰頭否認

我心裏面「嘩」咗一聲，一個小妹妹見到個全裸、唔識得嘅男仔都幫佢抹身，換作係我已經跑走咗

由於之後朋友沖完身叫我走，我冇留意後續，唔知小妹妹有冇父母陪同。不過最大問題係點解會有家長任由自己個仔唔著衫周圍跑，嚇到其他人呢？識得幫個仔著鞋，就唔識幫個仔著返好條褲？竟由得佢搵個唔識嘅小妹妹抹身又著衫，呢個男仔家長要檢討一下

讀者投稿@沙灘客