#ParentLicenses2807

我老母喺我細個嘅時候都好瘋狂——我完全唔記得發生咩事，只記得有日俾老母迫咗埋床角，佢瘋狂打我個頭幾十下，再扯我頭髮，勁恐怖，至今仍然記得

此外，佢仲有好多黐線嘢，例如揼爛我部手機，攞隻碟或者電視遙控車埋嚟，搣爛晒我細個啲相簿。有次佢追住我打，我匿入廁所，佢一嘢抽開廁所門，搞到玻璃門裂咗。同埋我細個最怕黑，佢一唔滿意我，佢就會困我入廁所一個鐘，熄晒啲燈

我老竇由細到大都冇保護過我，反而喺我喊到癲咗嘅時候，都仲叫我體諒吓老母，話佢都係想為我好，真係黐撚線難聽過粗口

通常呢啲家長dynamic都係一個abusive，而另一個做enabler

喺我16歲嗰年，我俾佢逼到癲咗，嘗試跳樓。佢見到我咁做，仍然只係瘋狂鬧我有公主病、好軟弱、咁就想死，完全冇諗過點解我會俾人逼到想跳。然之後佢為咗懲罰我就幾個月都冇同我講嘢，成半年後講返嘢都仲會攞我想跳樓件事嚟恥笑我

佢亦都會搞分化，叫屋企人排擠我。當我係佢嘅針對對象，black sheep of the family咁，成日都會同我阿妹同我老竇講我係異類，吩咐唔使理我

總言之，好多呢啲嘅說話我永遠都忘記唔到

直至去到入咗大學之後，我好努力補習賺錢，又好努力搵工，再加上住Hall，基本上完全唔會返屋企。佢哋見到我經濟算係獨立，心理上都完全獨立，開始知道對我人生失去緊話事權，喺呢兩年先慢慢對我好啲，唔再發癲鬧人、扔嘢同打人

惟而家反而覺得佢對我好，嘗試關心我呢啲行為令我好尷尬，甚至乎有啲假，或者係出自於內疚，但有啲嘢過咗去就彌補唔到，例如我嘅童年創傷

其實有好多成長唔開心嘅位我都放低咗，嘗試自己努力變好，賺取自由，努力去治癒自己，再加上我都有嘗試睇佢哋對我嘅好（例如佢都有俾心機谷我讀書 或者俾錢我去exchange等等），但始終我唔明點解佢當年可以咁殘忍咁對待一個小朋友

我諗我心入面童年陰影嗰條刺喺呢世人都唔會整得走，我亦唔會，甚至唔想同佢哋關係變得親近，就當我哋冇乜母女緣，保持適當距離，Hi-Bye就好了

讀者投稿@ ak