#ParentLicenses2785

想回應一下「我老公好唔熟」嗰個Post，因為我睇完之後，我覺得同我個情況非常非常相似

小弟喺幾年前帶一家人移民英國，喺英國搵到一份工，人工唔係高，而且唔係本行，但我總算非常努力，托賴都叫搵到高過香港嗰份收入

我太太本身喺香港都有份工，移民前就公一份婆一份，有工人用，生活輕鬆唔成問題。移民後，太太就做全職媽媽，零收入，所以成份重擔落晒我度

唔緊要，我辛苦啲冇問題，反正我份工唔係咩擔擔抬抬，只需要每日面對不同嘅人，不停講嘢，所以我平時返工都會比本地同事更勤力、更用心去做，因為我好想搵多啲錢去養活一家三口

每日放工返到屋企後都好攰，但我太太有意無意就會話我冇時間陪個仔，放假就應該全日陪佢去玩，有時間就去學下啲新技能，叫我試下再搵工轉行，又話我而家搵錢少唔上進

個仔讀緊小學，身邊啲同學嘅爸爸不缺乏專業人士，人工唔錯但係工作性質非常唔同。反觀自己，大哥呀！我四十歲喇，講就好易呀學個新技能去轉行，我放棄一切嚟到英國做一行我從未做過嘅一行已經好唔容易

有冇諗過其實我每日得返幾個鐘喺屋企，要我陪仔冇問題，但去學新嘢？我真係唔知可以做啲乜——電工？三行？裝修？會計？定你IT呀？由零做起我需要幾多時間同埋犧牲？

我都想好似其他爸爸咁，過百萬年薪，但現實係我實在冇辦法去賭博時間。我要轉行嘅話風險好大，我唔可以手停口停

我有時真係好想放棄，但我知我唔可以，我只係想佢可以理解我嘅難處，同埋我面對嘅壓力

讀者投稿@人夫