#ParentLicenses2753

今日同媽咪去沙田行街，喺4樓有幾架𨋢可以上到8樓飲食層，我都係第一次搭。我哋喺4樓等𨋢都等咗大約5分鐘先入到

事情開始發生。當時𨋢去到6樓開門，有一對父母推住一部BB車（BB車上有一個應該大約三四歲嘅小朋友），而爸爸就抱住另一個都差唔多大嘅小朋友

部𨋢本身都重有少少位，推BB車都勉強入到，惟𨋢門一開個媽咪就強行推BB車入嚟，爭啲成個轆碌咗落老人家度（佢拖住自己孫仔）

個老人家就開始嬲，然後對父母都起晒火

👵🏼：「唔好夾硬推入嚟啦，整到人啦」

👩🏻：「你企入啲啦，我哋推住BB車㗎，我等咗四架𨋢都入唔到😡」

媽媽個樣係不可一世，好似全世界得罪佢咁，總之佢有BB車就係大晒，大家都有郁一郁
.
跟住媽咪同BB車入到𨋢，爸爸抱住其中一個小朋友入唔到

輪到爸爸發火：「𨋢係俾BB車優先㗎（佢指住傷殘人士輪椅牌），有手有腳就搭電梯啦」

我好想問究竟有邊位係傷殘人士？我出咗𨋢搵咗一陣都完全見唔到架𨋢寫住係BB車優先喎🙄（同行係長者我先搭𨋢）。既然爸爸話有手有腳就唔應該搭𨋢嘅話，阿爸爸你都有手有腳，點解你唔去搭電梯？（你老婆同其中一個小朋友已經入到𨋢，你都可以選擇去搭電梯而唔係企喺個𨋢口唔俾架𨋢閂門）

最後有一個男仔出𨋢讓，先俾個爸爸入到

其實如果佢開頭好聲好氣叫大家讓一樣俾BB車入一入，我相信個老人家都唔會咁嬲，而唔係夾硬推落人哋度！而且唔係我哋令到你要生兩個小朋友同埋推BB車㗎！唔該唔好將怨氣發落我哋身上！

我都有幫老人家口，但見到個媽咪好似控制唔到自己情緒，去到中間大家都費事同佢講嘢。呀媽媽你小朋友睇住你喺度鬧人同鬧交，可唔可以控制吓自己情緒？

讀者投稿@無辜被鬧的小市民