#ParentLicenses2735

星期六約咗人去九龍東某間商場行街食飯，商場正在搞緊展覽

睇緊展覽途中，我見到展覽其中一角有對小姊弟，姐姐兩條腿一路踎喺弟弟中間，手扶住弟弟條腰兩側，弟弟又耷低個頭，睇落去好似姐姐幫緊弟弟屙尿

好奇嘅我就行過去望，望清楚先發現只係我嘅錯覺，姐姐只係踎喺度帶弟弟睇展板底下嘅相片同文字

過咗一陣，姐姐自己一個抱起弟弟，帶佢睇其他展板，放低佢之後就一齊四圍走，玩展覽區域入面嘅設施。我望住佢哋都感受到姐姐好錫弟弟，對弟弟好有愛心

目測姐姐大約九至十歲，弟弟睇落就似乎啱啱先學識行路。當時佢哋嘅父母在場望住，但大部分時間都係讓姐姐湊著弟弟，只係姐姐偶爾交俾爸爸抱一陣

呢個女仔好細個都識得照顧年紀細嘅弟弟，我好少見到呢一類小朋友，甚至其他差唔多年紀嘅小朋友未必識自理，而且會對家人發脾氣，再離譜啲係會打人

相比之下，嗰兩個小朋友好乖而且生得靚，弟弟全程只係嗌過一兩下，冇點聽到佢扭計或者喊，如果香港多呢啲有牌家長同小朋友咪幾好

讀者投稿@心裏面好欣賞兩姊弟