#ParentLicenses2698

好多年前，當時細佬同弟婦未有小朋友。細佬因爛賭輸好多錢，就被大耳窿上門，搞到份工都冇埋，大耳窿去搞埋弟婦啲屋企人。當時弟婦話要離婚，我哋一班兄長唔想見到細佬頭家散，就幫佢還咗債。弟婦都肯應承同細佬重頭努力過，而此之後兩年侄仔就出世

轉眼間侄仔兩三歲，嗰陣細佬又賭到出晒事。今次佢重將所有兄姊嘅地址、工作地點俾晒大耳窿，搞到我哋都被人騷擾。弟婦話要帶埋個仔離婚，但因其他兄弟都係生女，得細佬嗰邊有男丁，家母唔想冇咗個男孫，結果我哋又幫細佬還錢。細佬又係應承打幾份工還錢、戒賭咁，再幾年後到侄女出世

直到侄仔八九歲嗰年，細佬又因賭出事，重偷埋屋企人證件冒簽做擔保人。今次我哋喺弟婦未發現之前就幫佢解決咗，因為我哋都知弟婦呢個女人實唔肯同細佬捱會離婚帶走侄仔

侄仔十二歲嗰年細佬又嚟一單，然而今次我哋兄姊已經冇能力幫佢，因大家都有家庭有小朋友。弟婦話要離婚帶兩個小朋友走，家母話佢帶走侄女冇所謂，但侄仔就一定要留低。我哋幾個叔伯落足嘴頭俾咗好多壓力佢，最後侄仔為咗妹妹可以跟媽媽走，主動留低跟爸爸

弟婦離婚後帶住侄女生活都叫儲到個錢，反觀細佬依然唔生性繼續賭錢。侄仔長期要跟住嫲嫲、伯父、叔叔生活

侄仔十四歲嗰年，細佬欠下六位數巨債。前弟婦有錢有工作，又供侄女去國際學校，惟唔肯幫細佬還錢。最後，細佬輕生離開咗我哋。家母自此好憎呢個唔肯同細佬同甘共苦嘅女人

弟婦想帶返侄仔走，其實弟婦而家環境係有錢養晒兩個小朋友，可以俾到優質教育佢哋，但家母驚侄仔跟佢走後會唔返嚟，所以堅決唔畀侄仔跟返媽媽，出動一哭二鬧逼侄仔留低

其實我哋一班叔伯所謂「照顧」，都只係俾餐飯佢食，讀書管教嗰啲著實幫唔到太多，就算有錢都供自己個女讀書啦，點會供人哋個仔呀。所以侄仔都係去啲三流中學，既冇補習，亦冇興趣班，連佢套校服唔啱身，都係過時過節睇我哋邊位叔伯有閒情先帶佢去買而已

有段時間家母發現侄仔有錢買新衫新鞋，後來發現原來侄仔透過網絡同弟婦重有聯絡（弟婦已帶咗侄女去外國留學），弟婦俾錢佢。家母覺得侄仔有我哋咁多叔伯照顧仍要問弟婦拎錢有辱家風，就逼侄仔喺我哋面前block咗弟婦

弟婦有返嚟嘈過，話想帶埋侄仔去外國讀書，但家母驚侄仔見識過外面世界唔肯返嚟，唔俾侄仔去

自此，侄仔就開始反叛同出現管教問題，例如侄仔冇錢居然暪住我哋去做兼職，直至家母有次發現佢喺麥當勞掃地，心痛個孫做呢啲嘢，迫佢辭工，又叫我哋幫手俾啲錢侄仔

我哋一班叔伯都坦然有家庭壓力，家母話：「最多養到佢讀完中三出嚟做嘢囉，你哋幾個細個都係咁，有幾難養喎」我哋唔敢同佢講其實侄仔而家已經中五，驚佢連書都冇得讀

侄仔冇咗麥記份兼職之後，喺屋企好多時唔聽教，更會專登作對、駁咀，我哋教極佢都唔聽。有一次我太太忍唔住話佢：「唔係一班叔叔伯伯幫你老豆還錢，當年你父母一早離婚你邊有得出世呀？！」

佢竟然駁咀鬧返我哋，又話我哋誤咗佢媽咪終身幸福同令佢嚟到呢個世界，甚至執晒行李走咗去佢舅父度住，又話遲啲會跟媽咪去外國唔再見我哋呢班衰人

我哋上過門搵佢幾次，佢舅父唔肯俾我哋見佢。我有次衝動鬧佢舅父：「你一個外姓人，有咩資格唔俾我哋一班同姓嘅叔伯見佢？」侄仔走出嚟話佢十八歲會去改姓，同我哋脫離關係。我哋照顧同養咗佢咁多年，都係但求第日有人擔幡買水啫，始終家族得佢一個男丁，都唔明點解佢咁憎我哋，明明有我哋幫忙佢先有機會出世

讀者投稿@被侄仔憎恨既叔伯